D Mehrheit Lyrics & Chords By Franz Hohler

Si sitzt im Tram und im Zug und im Bus
Wenn's rägnet, isch si dinn, und wenn's schön isch, voruss
Si wüscht vor der Türe, und si dünget ihri Ärde
Am Samstig mäjt si der Rasen i de Gärte
Aber ghöre tuet si guet, und gseh tuet si gnau
Und am Sunndig hockt si im Autobahnstau
D Mehrheit
D Mehrheit
Die schwigendi Mehrheit –
Si isch von're grosse, dumpfe Rueh
Und nimmt jedes Johr chli zue!

Si list der "Blick" und macht d'Fuscht im Sack
Si zischlet im Stägehuus uf's frömde Pack
Zum Hässigsy het si immer e Grund
Gägen Oobe goht si chli use mit em Hund
Pass uf, dass di ihri Auge nid breiche
Und am Fritig luegt si s Aktezeiche
D Mehrheit
D Mehrheit
Die schwigendi Mehrheit –
Si isch von're grosse, giftige Rueh
Und nimmt jedes Johr chli zue!

Aber mängisch isch si au ganz elegant
Liggt schoggibruun amene Sörferstrand
Oder sitzt vor em Grill ufem Campingplatz
Oder stoht in're Boutique und suecht öppis Glatts
I de Parkhüser stigt si us gschniglete Wäge
Uf de Rollträppe schwebt si im Ychauf entgäge
D Mehrheit
D Mehrheit
Die schwigendi Mehrheit –
Si isch von're grosse, weiche Rueh
Und nimmt jedes Johr chli zue!

Und plötzlech gsehsch sen überall
Im Lift, i der Beiz, ufem Bou, im Stall
A de Schribtisch, i de Büro, i de Läde, a de Schalter
Bim Coiffeur und bim Dokter und bim Ligeschaftsverwalter
Und am zwölfi, do chunnt si, s verschloht der fasch der Pfuus
I Zwöierkolonne zum Schuelhuus us
D Mehrheit
D Mehrheit
Die schwigendi Mehrheit –
Si isch von're ganz normale Rueh
Und nimmt jedes Johr chli zue!

Si bruucht ke Kultur, ihre längt der Sport
Si kennt jeden Unfall, si kennt jede Mord
Si weis au immer s neuschte vom Wätter
Si het i jedem Verein e Verträter
Het e furchtbar länge und zäche Schnuuf
Und trotzdäm tuet si s Muul nid uf
D Mehrheit
D Mehrheit
Die schwigendi Mehrheit
Und wenn si ändlech merkt, was goht –
Denn isch es z spot!