Der Summer Isch Verby Lyrics & Chords By Burger
Ds Schwümmbad het no offe
U der Himel isch no blau
I bi obsy gloffe
U luege zrügg y ds Tal
I gse di lääre Ächer,
Wo scho lang abgärntet sy
U ds erschte gälbe Birkeblatt, das seit mir’s o:
Der Summer isch verby.
Am Morge isch es chüeler
U ds Gras isch nass vom Tou
Uf der Strass gseesch wider d’Schüeler
U am Aabe steisch im Stou
Es chöme graui Wulche
Un es fyschteret scho gly
U d’Fänschter vo de Chleidergschäft, di zeige’s o:
Der Summer isch verby.
Gly sy d’Bletter wider farbig,
D’Böim sy blutt u kahl,
Der Näbu schlycht dür ds Tal.
Ersch no grad isch Früelig gsy,
Je meh Zyt hinder mir ligt
U je weniger vor mir,
Umso schnäller geit’s verby.
D’Zyt het uf em Gsicht scho
Iry Spure hinderlaa
U Fründe, wo’d vilicht no
Gärn hättsch gsee, sy nümme da.
Der Bart wird langsam grau,
I bi scho füfevierzgi gsy
U ds Knacke y de Glänk, das seit mir dütlich gnue:
Der Summer isch verby.
Im Herbscht, da söll itz ryffe,
Was ym Summer no het blüejt.
I wett no Mängs begryffe,
Won i mi dermit ha gmüejt.
U wenn i einisch alt bi
U der Winter chunnt scho gly,
De lüpfen i mys Glas uf di u weis:
S’isch e schöne Summer gsy.
