Dies Irae Lyrics & Chords By Mediæval Bæbes

Dies iræ! dies illa
solvet sæclum in favilla,
teste David cum Sibylla!

Quantus tremor est futurus,
quando judex est venturus
cuncta stricte discussurus!

Tuba mirum spargens sonum
per sepulchra regionum
coget omnes ante thronum

Mors stupebit et natura,
cum resurget creatura
judicanti responsura.

Liber scriptus proferetur,
in quo totum continetur
unde mundus judicetur.

Iudex ergo cum sedebit,
quidquid latet, apparebit;
nil inultum remanebit.

Quid sum miser tunc dicturus?
Quem patronum rogaturus,
cum vix justus sit securus?

Rex tremendæ majestatis,
qui salvandos salvas gratis,
salva me, fons pietatis.

Recordare, Iesu pie,
quod sum causa tuæ viae,
ne me perdas illa die.

Quaerens me, sedisti lassus,
redemisti Crucem passus;
tantus labor non sit cassus.