Mi Voria Saver Lyrics & Chords By Gualtiero Bertelli

Mi voria saver perché 'st'aria xe ciara e 'sta zente sbasia che speta el siroco; 'sto mar grosso che va soto un cielo de piombo e che porta lontan un sol povaro e stanco. 'Sta zente va, no varda el tempo ciapa do strasse che impegnisse un burcio la sbarca più in là, dove l'aria xe scura ma l'aqua no riva, la se sente sicura. Sicura de no morir co i ossi bagnai ma neri de un fumo che no se ferma mai de un carbon duro e nero come una tomba ti piansi la to tera, casa nova no basta. Ti rimpiansi do muri in sima a un canal e ti serchi la speranza de tornarghe doman. Ma te spaca i polmoni 'st'aria nera de piera e te par che no riva mai 'sta primavera. Anca la piova de geri te par benedeta ti seri i balconi, ti te slavi da la spussa ti cori in terassa a ciamar su i fioi co parla Marghera tase i disperai. Ti tasi ogni giorno e ti pensi che mai ti dovevi lassar el to campo e la to casa. Morir forse negai no xe la nostra condana, ma senza respirar, o brusai de 'na fiama. Po ti conti che in fondo sento e trenta xe tanto sento e trenta mila al mese paga tute le spese. Viver poco te basta cassar fora la miseria se no basta se spera de poderse salvar. E ti te senti mal serà tra do foghi co l'aqua che cresse e col fumo che tira tornar no se pol, restar no se vive, crepar xe la sorte che el paron ne destina. Tornar no se pol, restar no se vive, crepar xe la sorte ch'el paron ne destina. Tornar no se pol, restar no se vive, crepar xe la sorte ch'el paron ne destina.