Use A See Lyrics & Chords By Polo Hofer

Ja ds Wätter stimmt u d'Sunne schynt,
Morn isch Sunntig, was wosch no meh.
So ne schöne Tag, das isch ke Frag
Hüt houe mir's use a See!

I bi gebore am Fluss u grad wie dä Fluss
Zieht's mi gäng abe zum See.
I ha scho als Chind tanzet im Wind
Bi dr Schiffländi dusse am Quai.
Und in ere Summernacht, under e Schtärnepracht
Wo i de WäIle gschpieglet isch gsy,
Ha mi verliebt zerschtemal, i weiss no genau
Wo n'i no i d'Schuel gange bi.
Es isch no mängisch passiert, bi mängisch gschpaziert
Am Uferwäg Hand i Hand
Jetz isch's wieder sowyt, chumm doch mit
Mir göh a ne sandige Schtrand.
Göh i d'Piratebucht, nähme mit was es bruucht
Mir hocke i ds glyche Boot,
Ob Forälle, ob Hecht, jede Biss isch üs rächt.
Mir fisched im Aberot.

Chumm mir fahre a See
S'isch Summer, was wosch no meh
Es schtellt Di uf, du wirsch es gseh
Drum chumm doch mit mer a See.
Oh lueg, dass du chasch cho
Du weisch, i fröie mi so
Es haut häre. du wirsch es gseh
Mir fahre zäme a See.

Mir sueche Holz u Papier, mir mache es Füür
U blybe die ganzi Nacht da.
Mir boue es Fescht mit Fründe u Gescht
U Musig, das hei mir ou da:
Ds Banjo von Gipsy Joe, Küre bringt ds Bongo.
U Heiri nimmt d'Handorgle mit.
Hei Brot u Wurscht, öpis gäge Durscht
I säge Dir, es wird e Hit!

Chumm mir fahre a See
S'isch Summer was wosch no meh
Es schtellt Di uf, du wirsch es gseh
Wenn mitchunnsch use a See
Oh lueg, dass du chasch cho
Du weisch, i fröie mi so
Es haut häre. du wirsch es gseh
Mir fahre zäme a See.

(Outro)
Nämed s'Gummiboot mit Giele. De nimmsch halt mi Töff und geisch's ga hole. Guet de träffe mer üs de a de Schiffländi. Ja genau uf di halbi Nüni isch guet …